SHQIPËRIA FITON EKONOMINË – Shqipëria Fiton

Voto ndryshimin. Voto Nr 9. Voto Partinë Demokratike.  Voto Bashën.

SHQIPËRIA FITON EKONOMINË

Kemi punuar me ekspertët më të mirë të vendit, në fushën e ekonomisë, financave, turizmit, arsimit, shëndetësisë, çështjeve sociale. Po kështu, një ndihmë të çmuar për programin tonë të ekonomisë kanë dhënë institucione ndërkombëtare, partitë tona simotra, institute dhe fondacione nga Gjermania deri në Shtetet e Bashkuara të Amerikës, nga Britania e Madhe në Itali e Greqi. Kemi punuar për t’i sjellë Shqipërisë një plan serioz zhvillimi, që do të rimëkëmbë dhe do ta gjallërojë ekonominë tonë dhe që do t’ua kthejë Shqipërinë shqiptarëve.

I kemi kushtuar shumë kohë këtij programi, sepse duam që të kemi një program qeverisje, një program të zbatueshëm që do t’u shërbejë shqiptarëve dhe Shqipërisë dhe jo thjesht një partie politike apo një fushate elektorale.
Ky është një program që do ta çojë Shqipërinë përpara, menjëherë pas fitores së zgjedhjeve të 25 prillit.
Keni dëgjuar kaq shumë premtime këto tetë vite, jeni lodhur nga ata që ju premtojnë botën dhe nuk ju japin asgjë. Ndodhi me kryeministrin në ikje i cili premtoi qindra, mijëra vende pune, por, në fakt, radhët e të papunëve u shtuan dhe mijërave të pamundurve për punë iu hoq edhe buka e gojës, ndihma sociale.
Premtoi të ulte koston e jetës për 97% të shqiptarëve, por me të kostoja e jetës për shqiptarët është rritur në shifra rekord. 40% gjatë viteve të sundimit të tij.

Premtoi ta bënte më të fortë ekonominë tonë, por ekonomia jonë është në kolaps dhe krizë totale. Është tërësisht e shkatërruar dhe e paaftë të përballet me sfidat e shqiptarit të përditshëm.
Premtoi ta bënte më të fortë ekonominë tonë, por ekonomia u shkatërrua dhe shqiptarët po e paguajnë ditë për ditë në xhepat e tavolinat e tyre të zbrazura. Kjo do të marrë fund. Kjo kulturë e premtimeve pa doganë dhe pastaj braktisjes së tyre totale do të marrë fund.

Ndaj, nuk ju premtojmë gjëra që nuk bëhen kurrë realitet. Planet tona nuk janë premtime. Janë angazhime të padiskutueshme të miat si kryeministër dhe të ekipit tim përpara, përpara çdo shqiptari. Si të tilla do të përmbushen. Një kryeministër që nuk është i aftë t’i përmbushë angazhimet që merr përsipër duhet të largohet.
Unë sot marr këtë barrë të përgjegjësisë para jush. Jo pas 8 vitesh, por direkt në katër vitet e para sipas një plani të detajuar muaj pas muaji, javë pas jave, ditë pas dite.
Ka ardhur koha për ndryshim. Ka ardhur koha ta ndryshojmë Shqipërinë. Ka ardhur koha ta largojmë këtë qeveri e të sjellim një qeveri që kujdeset për njerëzit dhe jo për veten e saj.

Edhe unë sot mund t’ju premtoj 500 mijë vende pune, pagën minimale 500 Euro, por ky do të ishte manipulim dhe unë nuk kam ndërmend të fitoj besimin tuaj me gënjeshtra. Koha e matrapazëve politikë që shesin shpresa boshe për të blerë pushtet për vete ka mbaruar.
I keni parë çfarë kanë bërë për ju dhe çfarë kanë rrëmbyer për vete, por para se të shpalos angazhimet e qeverisë së re dua të flas për objektivat e planit tonë që do t’i arrijmë përmes këtij programi. Kur them objektivat, e kam fjalën për objektivat e Shqipërisë. Objektiva nga të cilat do të përfitojmë të gjithë, të gjitha familjet tona.
Dyfishimi i të ardhurave për frymë është objektivi i ynë parësor, pasi kjo prek dhe përmirëson jetët e të gjithë shqiptarëve, të çdo familje, të çdo shtëpie, të çdo fëmije, prindi, gjyshi e gjysheje. Koalicioni ynë qeverisës angazhohet përmes programit tonë që shënjestron sektorë të caktuar të dyfishojmë të ardhurat për frymë.

Ne angazhohemi ta zhdukim varfërinë ekstreme. Nuk do të ketë më familje shqiptare që do të vuajnë për bukën e gojës, ujë dhe drita. Kjo plagë e tmerrshme është zmadhuar dhe dhëmb sot më shumë se kurrë më parë.
Nuk do të kemi më ministra që shumëfishojnë pasuritë, si në administratën e Ramës, por do të punojmë fort për të zhdukur mjerimin, varfërinë ekstreme në familjet shqiptare. Hapi i parë do të jetë dyfishimi i ndihmës ekonomike për të gjitha familjet në nevojë, shumë prej të cilëve sot janë jashtë skemës së ndihmës ekonomike.
Me zbatimin e programit tonë varfëria në tërësi do të ulet brenda mandatit tonë të parë me 50% ndërsa të gjithë treguesit e varfërisë do të përmirësohen me masat tona konkrete dhe të prekshme.

Shtresa e mesme është motori i zhvillimit sepse nxit transformimin e shoqërisë, nxit inovacionin dhe ecjen përpara të ekonomisë. Një shtresë e mesme e fortë është garante e stabilitetit ekonomik dhe politik të vendit. Një shtresë e mesme e fortë është faktor kyç për nxitjen e rritjes ekonomike.
Rritja e mirëqenies së familjeve shqiptare nuk është slogan, sepse mirëqenia lidhet direkt me shëndetësinë, me shëndetin, pra, me jetëgjatësinë dhe me gjithçka që ka të bëjë me të përditshmen e shqiptarëve. Programi ynë do ta bëjë Shqipërinë një vend, ku zhvillimi të marrë hov në çdo fushë dhe përfitimi të ndihet nga çdo shqiptar. Një Shqipëri e të gjithë shqiptarëve jo vetëm e 10 vetëve, siç është sot.

Familja është në qendër të politikave tona. Familja shqiptare është qendra, shtylla e politikave tona. Shqipëria do të fitojë me familje më të arsimuara, me familje me të ardhura të sigurta, me familje që marrin mbështetje nga shteti dhe që paguajnë taksa të ulëta, të cilat do të ulin shpenzimet familjare dhe do të rrisin mirëqenien.
Rinia ka qenë është dhe do të jetë në këtë program fokusi kryesor i imi personal dhe i politikave tona. Rinia shqiptare është fokusi i këtij programi dhe e ardhmja e vendit. Çdo masë, reformat fiskale, taksat, arsimi, politikat e nxitjes së investimeve të punësimit kanë për qëllim kryesor promovimin e të talentuarve dhe të të aftëve dhe thithjen e talenteve të reja. Largimi i të rinjve, largimi i potencialeve njerëzore është një katastrofë kombëtare dhe, ndoshta, çështja më e rëndësishme që do të ndikojë në të ardhmen tonë.

Kjo qeveri jo vetëm e la këtë çështje në harresë të plotë, por nxiti emigrimin më masiv ndër dekada. Si rezultat, çdo familje shqiptare është prekur nga ky fat, çdo prind pyet çdo ditë “Si do t’ia bëjmë me fëmijët? Si do të mundësojmë që ata të ndërtojnë një jetë të mirë dhe normale në Shqipëri?!”. Zgjidhjet e planit tonë i japin përgjigje këtyre dilemave jetike, të çdo prindi, të çdo familje shqiptare.
Më lejoni të ndaj me ju disa prej çështjeve kryesore të planit tonë, të cilin do ta vëmë në zbatim, së bashku, duke nisur nga dita e parë e punës si kryeministri juaj.

Angazhimi i parë i programit tonë është minimumi 110 mijë vende të reja pune për shqiptarët, përmes përmirësimit klimës së biznesit dhe tërheqjes së investimeve të huaja.Krijimi i vendeve të punës është jetik për stabilitetin ekonomik dhe çelësi që njerëzit të investojnë tek vetja e tyre dhe fëmijët e tyre.

Unë angazhohem të rris pagën minimale dhe ta çoj atë në 36 mijë lekë të reja në muaj. Zotimi im i para 2 viteve para Bashkimit të Sindikatave shqiptare, është sot pjesë e planit tonë ekonomik. Rritja e pagës do të bëhet duke krijuar lehtësira për biznesin, duke e mbështetur atë, që jo vetëm të rritet paga minimale, por edhe numri i të punësuarve dhe jo siç ndodh sot, ku për shkak të kostove, taksave, gjobave, biznesi detyrohet të shkurtojë vende pune. Në qofte se biznesi shkurton vende pune, nuk ka asnjë vlerë rritja e pagës minimale. Ndaj, qeveria jonë do të mbështesë dhe do të mbrojë të gjithë punonjësit dhe të vetëpunësuari. Kjo është detyrë bazë e qeverisë: të mbrojë interesat e njerëzve, por, njëkohësisht, përmes masave tona fiskale dhe ekonomike, qeveria do të garantojë konkurueshmërinë e të gjithë punëdhënësve, të cilët jo vetëm nuk do të humbin, por do të përfitojnë nga masat e planit tonë ekonomik, duke bërë të mundur që të gjithë të dalin të fituar nga ky plan.

Për 8 vite Rama ua rriti taksat shqiptarëve dhe i varfëroi ata. Unë angazhohem t’i ul taksat mbi të ardhurat personale në 9%, duke ruajtur fashën mbrojtëse ekzistuese prej 30 mijë lekësh. Po kështu, të vendosim taksën 9% të fitimit mbi të gjitha sipërmarrjet shqiptare me një xhiro vjetore mbi 14 milionë lekë të reja. Unë angazhohem të ul sigurimet shoqërore në vlerën 18%. Totali i taksave dhe tarifave vendore i bizneseve të vogla e të mesme nuk do të jetë më i lartë se 0.5% e xhiros. Ky është angazhimi im dhe i qeverisë sime për biznesin e vogël e të mesëm.

Dua ta përsëris fare qartë se një nga vendimet e para të qeverisë të dalë nga vota e 25 prillit do të jetë anullimi i taksës “Rama” prej 24 lekë të reja për litër mbi karburantin. Për të gjithë operatorët e transportit shqiptar, për çdo pronar automjeti, nga më i riu tek më i vjetri, për të gjithë ata që nuk kanë një automjet, po e ndiejnë pickimin në lëkurën e tyre sa herë u duhet të udhëtojnë brenda qytetit, nga një qytet në tjetrin, për këdo që e di apo e mëson sot se karburanti është pjesë e çmimit të gjithçkaje që blejnë në treg dua t’ua them fare qartë se prej ditës së parë të qeverisë së re të dalë nga vota juaj më 25 Prill çdo litër karburant do t’ju kushtojë 240 lekë më pak të vjetra sesa ju kushton sot. Taksa Rama mbi karburantin do të eliminohet.

Këto nuk janë thjesht shifra. Ky është një ndryshim që do të prekë çdo shtëpi, çdo familje, çdo individ. Këto janë paratë tuaja për të cilat punoni dhe këto para do të jenë tashmë në xhepat tuaja dhe në duart tuaja, nga Vermoshi në Konispol. Kjo do të bëjë të mundur që çdo qytetar shqiptar me qeverinë e dalë nga vota e 25 Prillit të ketë më shumë lekë në xhepat e tij, në duart e tij se sa ka sot. Më shumë para për veten tuaj dhe jo për të shumëfishuar pasuritë e qeveritarëve të Ramës.

Me këto masa shqiptarët do të kenë, por edhe do të shpenzojnë më shumë për veten e tyre dhe për familjen e tyre, për arsim më të mirë, për kushte më të mira jete, për shëndet më të mirë për çdo shqiptar. E përsëris, janë paratë tuaja të cilat sot, padrejtësisht, vidhen dhe shpërdorohen, paratë për të cilat punoni dhe rropateni. Nesër këto para do të jenë në dorën tuaj, do të jenë në xhepat tuaj, për veten tuaj, për familjen tuaj.

Angazhohem se do të rrisim pensionet me të paktën dyfishin e normës së inflacionit dhe, në çdo rast, jo më pak se 5% në vit me synimin që, në fund të mandatit tonë të parë, pensionet mesatare shqiptare të kenë kaluar pensionet mesatare të rajonit. Kudo në Shqipëri takoj njerëz, bashkëmoshatarë apo më të rinj që ndajnë të njëjtën brengë, pamundësinë e prindërve pensionistë për të mbyllur muajinë. Boll më! Ka ardhur koha të garantojmë që të moshuarit tanë të jetojnë me respektin dhe dinjitetin që meritojnë. Ne do të garantojmë që të moshuarit tanë të jetojnë me respekt, që t’u plotësohen nevojat bazë, që çdo gjyshe dhe çdo gjysh të jetë i sigurt dhe të ketë vendin e vet në shoqërinë tonë.

Angazhohem të ul çmimin e energjisë elektrike dhe çmimin e karburanteve, çka, padyshim, do të ndihmojë jo vetëm klimën e biznesit, por dhe familjet shqiptare. Do t’u vimë në ndihmë të gjitha familjeve shqiptare dhe, sidomos, çifteve të reja, pa përjashtuar askënd.

Ne do të mbulojmë shpenzimet arsimore për tarifat universitare për 90% të studentëve që vijnë nga familje me të ardhura me pak se 640 mijë lekë të vjetra në muaj. Arsimimi, dija, kultura. Shqipëria ka nevojë për një qeveri e një kryeministër të ekonomisë, Shqipëria do të ketë pas 25 Prillit një qeveri e një kryeministër të ekonomisë, por Shqipëria ka po kaq nevojë për një kryeministër e qeveri të dijes.

Arsimi është gjithçka për mirëqenien dhe të ardhmen e çdo fëmije, suksesin dhe fatin e çdo të riu, për të ardhmen e shoqërisë dhe të kombit. Arsimi është ajo nga e cila përfitojmë të gjithë përmes programit “Shqipëria fiton nga arsimi.
Ne do t’u japim fëmijëve mundësinë për të patur programe passhkollore edukative dhe do t’u ofrojmë atyre ushqim në shkollë për orët shtesë. Kështu do t’i mbajmë fëmijët tanë të sigurtë dhe larg rrugëve.

Tekstet shkollore do të jenë falas për të gjithë ciklin parauniversitar. Arsimi, dija, përgatitja e brezit të ri. Ne do të investojmë që çdo fëmije t’i jepet mundësi e barabartë për të pasur sukses. Familjet shqiptare po vuajnë prej kohësh dhe kjo qeveri vetëm i ka shpërfillur vuajtjet, sakrificat e tyre të dhimbshme për arsimimin e fëmijëve të Shqipërisë.
Ne do të mbështesim familjet shqiptare. Çdo familje do të përfitojë për të porsalindurit një pagesë mujore prej 3 mijë lekë të reja për pesë vitet e para të jetës. Çdo vit të qeverisjes time, 5 mijë çifte dhe familje të reja do të përfitojnë nga subvencionimi i plotë i interesave të kredive për strehim, çka do të thotë për të sapomartuarit, të sapofejuarit apo për ju që doni të hidhni këtë hap në jetë, por që nuk keni asnjë mundësi as ta çoni nëpër mend blerjen e një banese, se pas 25 prillit qeveria juaj do të paguajë 100% interesat bankare për çdo kredi që do të merrni për të blerë një apartament apo një banesë.

Në fund të mandatit tonë të parë, do të jenë 20 mijë çifte dhe familje të reja që do të kenë siguruar strehim përmes kësaj skeme të subvencionimit të interesave.
Ne do të japim një financim rekord nga buxheti i shtetit për fermerët dhe kjo është diçka që unë kam pasur mundësinë ta diskutoj me ta nga jugu në veri, nga lindja në perëndim. Për herë të parë, me qeverinë e dalë nga vota e 245 prillit, fermeri shqiptar do të ketë të njëjtën mbështetje si fermerët e vendeve fqinje.

100 milion euro mbështetje direkte, si dhe sigurimin e fondeve për çdo kulturë bujqësore ose blegtorale. Fermerët janë zemra punëtore e Shqipërisë. Prodhimet e tyre duhet e do të jenë krenaria jonë. Ne do të zhvillojmë dhe investojmë në bujqësi, ushqim dhe blegtori që Shqipëria të përparojë me thithjen e teknologjive të avancuara.

Këto janë vetëm disa nga objektivat kryesore të planit tonë të punës për Shqipërinë.

  • Me këtë plan fiton Shqipëria.
  • Me këtë plan fitojnë shqiptarët.
  • Me këtë plan fitoni Ju.
  • Shqipëria do të fitojë vetëm me vullnetin dhe votën tuaj.
  • Shqipëria do të fitojë pas 8 vitesh premtime të pambajtura.
  • Kur Shqipëria fiton, çdo shqiptar fiton.

Partia Demokratike e Shqipërisë. Të gjithë të drejtat e rezervuara.

to top