SHQIPËRIA FITON SHËNDETËSINË- Shqipëria Fiton

Voto ndryshimin. Voto Nr 9.  Voto Partinë Demokratike. Voto Bashën.

SHQIPËRIA FITON SHËNDETËSINË

Plani ynë shëndetësor do të ndryshojë jetët e prindërve tuaj. Plani ynë shëndetësor do të ndryshojë jetën e fëmijëve tuaj, por për të pasur një shëndetësi më të mirë, duhet, më së pari, të shërojmë vendin tonë, t’ua kthejmë Shqipërinë shqiptarëve dhe t’i japim fund dështimeve 8-vjeçare të Ramës.
Me këtë plan, ne do ta shërojmë Shqipërinë. Do të krijojmë kushtet qe jo vetëm të ringrihemi nga shtrati i lëngimit, por të ndërtojmë një sistem model për të gjithë rajonin.

Sot, ne angazhohemi dhe u garantojmë gjithë shqiptareve se do të bëjmë një ndryshim në shëndetësi, që do te sjellë një jetë më të shëndetshme dhe me cilësore për të gjithë, pa përjashtim. Që të ecim përpara, e keqja duhet të largohet, që të përparojë ekonomia, që të përmirësohet dhe zhvillohet shëndetësia.
Sepse kur rënkon i gjithë vendi, të gjithë jemi sëmurë. Kur vendi ynë lëngon, nuk mund të ringrihet dot shpejt nga goditje si ajo e tërmetit.

Kur vendi është i mbërthyer nga kriza, nuk është në gjendje të shpërndajë ndihmë ekonomike për qytetarët të vet në kohën e pandemisë globale.
Kur vendi ynë rënkon, nuk u ofron dot qytetarëve spitale dhe kujdesin e duhur shëndetësor.
Ndaj, në fillim, duhet të shërojmë vendin, për t’u bërë edhe vetë mirë.
Për këtë arsye, këto muaj, kam pasur nderin dhe privilegjin të punoj me ekspertët më të mirë për një plan shëndetësie që do ta ndryshojë Shqipërinë.
Për Planin tonë të shëndetësisë, ne u qëndrojmë të njëjtave parime si me planin e ekonomisë: një plan serioz dhe të zbatueshëm.

Ne shqiptarët sot paguajmë më shumë nga çdo vend tjetër në rajon para nga xhepi për kujdesin shëndetësor.
Ne angazhohemi që jo vetëm të ulim tarifat në mënyrë të ndjeshme, por edhe që këto para të mos shkojnë në xhepat e atyre që kanë kapur sistemin shëndetësor, por të kthehen përsëri tek ju me një shërbim cilësor dhe dinjitoz si për çdo qytetar Europian.
Ja cilat janë pikat kryesore të planit tonë:

  •  Pacienti do të vendoset në qendër të sistemit sipas parimit “paraja ndjek pacientin.” Ju vetë do të zgjidhni mjekun e familjes, klinikën apo spitalin ku doni të kuroheni.
  • Spitalet publike do të riorganizohen duke dhënë autonomi menaxheriale për të rritur kujdesin dhe aftësinë për t’ju shërbyer ju sa më mirë.
  • Do të ketë paga dinjitoze për mjekët dhe infermieret. Në programin tonë “Shqipëria fiton Shëndetësinë” paga e infermierëve do të bëhet 700 Euro dhe e mjekëve do të behet 1200 Euro. Në këto kohë të vështira ne e pamë, se pavarësisht se ishin lënë pas dore, ata ishin heronjtë tanë! Ata luftuan për ne, për të afërmit tanë, në vijën e parë! Dhe e meritojnë!
  • Ne do të rrisim numrin e mjekëve dhe do të hapim një fakultet të ri mjekësor në Shqipëri.
  • Ne do të sigurojmë menjëherë bazën ligjore dhe do të ushtrojmë kontroll të plotë që në Shqipëri të shiten vetëm ilaçe të cilësisë së lartë të standardit të vendeve europiane.
  •   Ilaçet do të rimbursohen sipas diagnozës dhe jo sipas skemës aktuale kufizuese, që lë jashtë saj shumë medikamente për njerëzit dhe i detyrojnë ata të paguajnë nga xhepi.
  • Riorganizmi i shërbimit të shëndetit publik do të bëhet sipas standardeve ndërkombëtare, në mënyrë që të jemi të përgatitur të përballojmë me sukses edhe sfidat e së ardhmes.
  • Programi ynë “Shqipëria fiton Shëndetësinë” ka në fokus dhe kujdeset për shëndetin e secilit prej jush dhe brezave që vijnë.
  • Pas fitores së zgjedhjeve do ta shërojmë vendin dhe të gjithë do të jemi më mirë. Do të kemi kujdes shëndetësor më të mirë.Do të kemi më shumë mjekë dhe infermierë në Shqipëri, në spitalet dhe qendrat tona shëndetësore. Mjekët dhe infermieret nuk do ta braktisin më vendin, sepse me planin tonë “Shqipëria fiton shëndetësinë”, do t’ia vlejë të punojnë në vendin e tyre. Do të shpenzojmë më pak para nga xhepi për shëndetin dhe për mjekësinë!

Partia Demokratike e Shqipërisë. Të gjithë të drejtat e rezervuara.

to top